Urriðavöllur
Einstakt umhverfi og náttúrufegurð einkenna völlinn.
Völlurinn er hannaður af Hannesi Þorsteinssyni, golfvallahönnuði, völlurinn er fyrst og fremst hugsaður sem skemmtilegur klúbbvöllur frekar en erfiður keppnisvöllur. Helstu kylfingar landsins hafa þó fengið að kynnast því að hann er engan veginn auðveldur viðfangs og sómir sér vel sem keppnisvöllur eins og keppendur á Íslandsmótinu 2006 geta vitnað um.
18 holu Urriðavöllur var vígður 8. ágúst árið 1997 en hafði fram að þeim tíma verið 9 holu völlur frá árinu 1990. Við hönnunina var höfuðáhersla lögð á að nýta sérkenni landslagsins. Undir hraunjaðrinum eru margar holuflatir þannig að jaðarinn myndar fagurt baksvið. Þá eru teigar uppi í hraunjaðrinum til þess að skapa yfirsýn yfir brautina framundan. Ein hola er að öllu leiti inni í hrauninu. Efstu holur vallarins eru í 100 metra hæð yfir sjó, en flestar þeirra í 60 – 70 metrum yfir sjó. Öllum brautum vallarins hafa verið gefin heiti, sem sótt eru í gömul örnefni eða landslag. Nafn hverrar brautar er skráð á stuðlabergsstöpul og ennfremur er þar mynd af brautinni og lengd tilgreind.
Enginn getur á móti því mælt að golfvöllurinn í Urriðavatnsdölum er í fögru umhverfi þar sem aðstaðan og umgengni er til fyrirmyndar. Kylfingum skal svo eftirláta, hverjum og einum, að dæma um hann að öðru leyti.