Magnaðir Odds krakkar á fyrsta GOLF14 móti sumarsins

Metfjöldi kylfinga var skráður í fyrsta mót sumarsins í GOLF14 aldursflokkamóti GSÍ. Alls 166 sprækir keppendur á aldrinum 14 ára og yngri.

Mikil stemning var á svæðinu, fjölskyldur og vinir komu saman og áttu góðan dag á Nesvellinum.

Frábær skráning var hjá okkur í Golfklúbbnum Oddi, en alls voru 20 keppendur á okkar vegum skráðir til leiks og áttu okkar krakkar magnað mót.

Keppt er í þremur aldursflokkum í stúlkna og drengjaflokki. Alls komust 5 krakkar á verðlaunapall og við áttum sigurvegara í tveimur aldursflokkum, til hamingju Ásta Sigríður og Jóhann Karl.  

Í flokki 13 – 14 ára stúlkna voru leiknar 27 holur og hafnaði Emilía Sif Ingvarsdóttir í 2. sæti. Lék alls á 120 höggum ( 40 /41 /39)

Í flokki 11 – 12 ára stúlkna voru leiknar 18 holur og þar sigraði Ásta Sigríður Egilsdóttir flokkinn á frábæru skori 87 höggum (44/43) og  þriðja sæti varð svo Hekla Ólafsdóttir en hún lék á 92 höggum (45/47), sami höggafjöldi og stúlkan í 2. sæti en þar sem seinni hringurinn telur þá til að skilja að hafnaði Hekla í 3. sæti. 

Í flokki 10 ára og yngi stúlkkna voru leiknar 18 holur og þar varð Hildur María Karlsdóttir jöfn í 2. -3. sæti á 103 höggum (52/51).

Í flokki 10 ára og yngri drengja áttum við svo sigurvegara, þar voru einnig leiknar 18 holur og Jóhann Karl Ingvarsson sigraði þann flokk á 82 höggum (38/44). 

Við óskum öllum okkar krökkum innilega til hamingju með flott mót og verðlaunahöfum til hamingju með sinn frábæra árangur. GSí, Golf14 og Nesklúbburinn færum við þakkir fyrir alvöru stórmót.

Áfram GO.