Kynning á frambjóðendum til stjórnar GO 2025/2026

Birt hér í stafrófsröð

 

Árni Traustason

Ég gef kost á mér til aðalstjórnar, en til vara gef ég einnig kost á mér í varastjórn, Golfklúbbsins Odds og vil hér kynna stuttlega bakgrunn minn og áherslur.
Ég er fjögurra barna faðir búsettur í Kópavogi og hef verið félagi í Golfklúbbi Odds frá árinu 2008. Á þessum tíma hef ég kynnst bæði klúbbnum og samfélaginu í kringum hann mjög vel og lít á klúbbinn sem fjölskyldu sem er sífellt að stækka og dafna. Golfið er stór hluti af mínu lífi og það hefur verið ánægjulegt að sjá einn af mínum drengjum taka virkan þátt í íþróttinni og vaxa innan íþróttarinnar.
Ef mér verður treyst fyrir stjórnarsetu mun ég leggja áherslu á eftirfarandi:
1. Barna- og unglingastarfið – hjarta klúbbsins
Barna- og unglingastarfið á að vera hjarta klúbbsins og lykill að framtíð hans. Með vaxandi áhuga ungs fólks og sterku faglegu þjálfunarumhverfi vil ég vinna að því að tryggja að þetta starf fái áframhaldandi vöxt, betri aðstöðu og skýra stefnu.
2. Sterk innviðauppbygging og aðstaða fyrir alla
Með stækkun vallarins og auknum fjölda kylfinga er mikilvægt að klúbburinn sé tilbúinn til að taka á móti stærri og fjölbreyttari hópi félagsmanna. Ég vil leggja áherslu á að ákvarðanir um uppbyggingu séu faglegar, vel ígrundaðar og í takt við framtíðarsýn klúbbsins.
3. Byggja upp faglegt og öflugt þjálfunarumhverfi
Við viljum byggja upp faglegt og öflugt þjálfunarumhverfi innan klúbbsins sem styður bæði barna- og unglingastarf og aðra félagsmenn. Markmiðið er að tryggja að allir fái góða kennslu, skýra stefnu og að klúbburinn sé leiðandi í þjálfun og þróun kylfinga á öllum aldri.
4. Sterkari ímynd og tengsl út á við
Með vaxandi áhuga á golfi og bættri aðstöðu hefur GO einstakt tækifæri til að styrkja ímynd sína enn frekar. Ég vil leggja mig fram um að klúbburinn verði leiðandi í þjónustu, samskiptum og kynningarstarfi — þannig að samfélagið í kringum Odd verði enn sterkara.
Ég er tilbúinn að leggja inn tíma, kraft og áhuga í stjórnarstörf og vinna að áframhaldandi uppbyggingu sem þjónar framtíð klúbbsins og félagsmanna hans.
Ég vona að éfái traust ykkar og stuðning á komandi aðalfundi.

_____________________________________________________________________________________________________________

Jón S. Garðarsson

Ágætu meðlimir Golfklúbbsins Odds. Jón S Garðarsson heiti ég og býð mig fram til stjórnarsetu í Golfklúbbnum okkar til tveggja ára sem aðalmaður. Ég kom inn í stjórnina fyrir sjö árum og hef verið gjaldkeri Odds síðastliðin tvö ár. Það að vera gjaldkeri er ekki auðvelt starf og á hverju ári kem ég með fjárhagsáætlun sem miðar fyrst og fremst að því að viðhalda gæðum Urriðavallar ásamt því að vega og meta hækkun meðlimagjalds ár hvert. Fram til þessa og einnig í nýrri fjárhagsáætlun hefur hækkunum verið stillt í hóf og horft til „eðlilegrar“ hækkunar þar sem launa- og neysluvísitala eru teknar og vegnar inn í hækkunina. En þrátt fyrir að ég sé ár hvert að íþyngja félagsmönnum með hækkunum á gjöldum fer ég þess á leit við ykkur að ég fái ykkar atkvæði til áframhaldandi setu í stjórn Golfklúbbsins Odds. Það er klárt að rekstur klúbbsins, réttu megin við „núllið“ er það sem skiptir máli. Nú fara í hönd mikilvægir tímar þar sem að tekist verður á um stækkun Urriðavallar um 9 holur. Öll tilskilin leyfi eru komin í hús en fjármögnunin er verkefni næstu mánaða, þessi gríðarlega fallegi völlur sem er inni í einhverju fallegasta landi sem hægt er að hugsa sér sem golfvallarsvæði verður enn fegurri þegar búið verður að fjölga holum, breyta og bæta núverandi holum og tel ég mikilvægt að þeir sem að þeirri undirbúningsvinnu hafa komið sinni henni áfram sem sitjandi stjórnarmenn.

Ég er giftur, á fimm börn, þar af þrjú sem stunda golf, tveir drengir í Oddi en ein er við nám í USA og spilar sitt golf þar, ekki sem afrekskylfingur heldur með öðru námi. Eiginkona mín, Anna Sigríður Ásgeirsdóttir er í barna og unglingaráði án þess að við eigum börn á þeim aldri sem þar æfir, þetta lýsir áhuga okkar hjóna á sjálfboðaliðsstarfi og hugsun að gera vel fyrir samfélagið. Þar situr hún með Páli Pálssyni í stjórn sem einnig býður sig fram til áframhaldandi stjórnarstarfa í Oddi. Það samstarf innan BUR er á góðri vegferð og styð ég Pál til áframhaldandi stjórnarsetu í Oddi. Ég hef gríðarlega mikla reynslu af stjórnunarstörfum í áhugamanna félögum, starfaði í 33 ár sem skíðaþjálfari í skíðadeild Breiðabliks og Víkings. Sat í meistaraflokksráði karla í knattspyrnu í Breiðablik ásamt því að vera aðalmaður í stjórn Knattspyrnudeildar Breiðabliks. Sá um og er einn af stofnendum Kópavogsblótsins sem endaði á að setja heimsmet í þátttöku á þorrablóti en rúmlega 2.500 manns voru samankomin á því blóti, en það var kannski ekki erfitt þar sem að þorrablót eru nánast bara haldin á Íslandi. Það væri mér mikill heiður ef þið, félagsmenn í Oddi ljáið mér atkvæði ykkar til áframhaldandi stjórnarsetu í Oddi.

Núverandi stjórn er gríðarlega samheldin og er mikil orka og góð ára yfir okkar störfum, áfram Golfklúbburinn Oddur og áfram við – Urriðasvæðið er framtíðar útivistarsvæði stórhöfuðborgarsvæðisins og vil ég taka þátt í mótun þess.

___________________________________________________________________________________________________________________

Ég, Páll Kolka Ísberg, býð mig fram til setu í aðalstjórn golfklúbbsins Odds 6. desember 2025. Bakgrunnur minn eru störf í yfir 45 ár í bankakerfinu, að mestu í stjórnunarstörfum, og þarf af fimm ár erlendis í Noregi. 
Hef ég fjölbreytta reynslu á sviði stjórnunar og stefnumótunar, alþjóðlegra viðskipta, verkefnastjórnunar og samningastjórnunar. Hef stýrt eða stjórnað fjölda verkefna m.a. sem framkvæmdastjóri verkefnastofu Íslandsbanka og bar þar m.a. ábyrgð á mjög stórum verkefnum, sum hver t.a.m. stærri að umfangi en fyrirhugað verkefni um stækkun golfvallar Odds.

Hef ég setið setið í ýmsum stjórnum gegnum lífið s.s. fyrirtækja, félagasamtaka, verkalýðsfélaga og ráða ásamt því að vera formaður margra ólíkra stýrihópa.

Ég gekk í Odd 1999 og hef verið þiggjandi að mestu þennan tíma og langar að gefa til baka til klúbbsins enda kominn á eftirlaun og nægur er tíminn nú ef Guð lofar. Ég lýsi því yfir að ég er “andlega og líkamlega fær um” að leggja mitt af mörkum til framdráttar golfklúbbnum Oddi á næstu árum og framboð mitt er gert með fullri vitund og samþykki míns betri helmings, hennar Unni Helgu Kristjánsdóttur. 

___________________________________________________________________________________________________________________

Páll Þórir Pálsson (Palli) heiti ég. Ég er 50 ára, giftur og með þrjú börn í Oddinum. Ég hef verið í stjórn Odds fyrst sem varamaður árið 2022 og síðar í aðalstjórn frá 2023. Ég býð mig áfram fram þar sem núverandi stjórn er vel skipulögð, samstíga í verkum og höfum haft mikla ánægju af starfinu. Einnig er ég formaður í barna og unglingaráði. Ég vil sitja áfram í stjórn ekki bara vegna þeirra hlutverka heldur einnig hef ég gaman að því þar sem golfið er mín uppáhalds íþrótt. Mitt mat er þar sem allir bjóða sig fram áfram að við höldum þeirri stefnu og klárum þau mál sem framundan eru og þar með stækkun á Urriðavelli, og komandi stækkun á skála (eða nýjum) ásamt æfingarsvæði innanhúss.

____________________________________________________________________________________________________________________

Til varamanna í stjórn bárust eftirfarandi framboð.

Birt hér í stafrófsröð

Ágúst Valgeirsson